من عامل تشغيل لمدير شركة ديزني لاند ?

سنة 1957 اتولد "جون لاستير" صاحب فكرة صناعة الأفلام الانيميشن بتقنية 3D.

قصة جون لاستير هي أحسن مثال للمثابرة والسعي لتحقيق الحلم، مهما كان رفض أكبر الناس شأنًا لفكرتك، المهم إيمانك بها وبنجاحها والسعي لظهورها للعالم كله.

اتخرج جون من معهد الفنون سنة 1979، وبرغم حبه الكبير للرسم إلا إنه قرر يبتكر حاجة جديدة، ليها علاقة بشغفه برضو بس بشكل متطور أكتر وبتفكير في المستقبل.

بدأ شغله في إجازته الصيفية، وحارب عشان يوصل لأكبر شركة رسوم متحركة، وهي بالطبع "ديزني لاند"، اشتغل فيها بالفعل كعامل تشغيل، وقرر يطرح أفكاره عليهم، وهي إنهم ينتجوا أفلام 3D بالكمبيوتر للرسوم المتحركة بدل الـ 2D المعتادة.

بس للأسف الفكرة مالقيتش أي تقبل من الرؤساء؛ شافوا إنها هيكلفهم مبالغ كبيرة، ولا حتى الرسامين اللي كانوا شغالين في ديزني وافقوا؛ حسوا إن كده قيمتهم هتضيع، وضغطوا عليهم ميوافقوش وإلا هيسيبوا الشغل وده طبعًا وقتها كان خسارة كبيرة لديزني.

هما كانوا فاكرين كده، لإنهم مبصوش للمستقبل وقتها، كل ده ما هزش جون خالص وفضل متمسك بفكرته لحد ما ديزني وافقت إنها تنتج له فيلم قصير، وبعد اما خلصه كفكرة وسيناريو، ديزني سألته على التكلفة فكانت متقاربة جدًا من تكلفة االأفلام التانية اللي بتنتجها، بس رفضت للمرة التانية وقامت بطرد جون لاستير من الشركة.

جون ما استسلمش للحظة واحدة، وراح أقنع ستيف جوبز بفكرته لغاية ما انتج له فيلم Toy story اللي كلنا متعلقين به، واللي اخد جايزة الأوسكار وقتها، واللي بعدها ديزني لاند كان تقريبًا بتتحايل عليه عشان يرجع للشغل معاهم، رجع بالفعل ووصل لإنه يبقى مدير ديزني لاند.

جون كان مؤمن بحلمه، ومخافش من الإبداع وتغيير الشئ المعتاد، وعمل فكرة جديدة محدش تقبلها في البداية، بس لما جربها وهما شافوا قد إيه هي عظيمة كلهم صقفوا له وأتمنوا إنه يشتغل معاهم. هو نجح عشان قرر ياخد الـ risk ويجرب.

إنت بقى مستني إيه عشان تاخد الـ risk وتجرب؟

#WORK_BRAND

#Power_of_success ?