هات السمكة أنا مش عايز أصطاد! ✋

 عارف المثل اللي بيقول: "لا تعطني السمكة ولكن علمني كيف اصطاد"

حاليا الوضع اتغير خالص وبقينا عايزين السمك على طول، وده سبب نجاح مشاريع كتير جدًا، يعني الوضع اتغير لصالحك لو عندك فكرة مشروع وعايز تنفذها . 

كريس جيلبو في كتابه "مشاريع ناشئة ب 100 دولار" بيقولك بيع للناس اللي بتشتريه. الناس عايزة السمك على طول مش لسه هتروح تصطاد!

بس ده مش معناه إنك متخترعش منتج أو خدمة جديدة، هو بيقولك متخافش لو عايز تعمل نفس الفكرة اللي صاحبك عاملها، بس عشان تبقى مميز ضيف عليها قيمة، أو خدمة جديدة عشان العملاء تختارك إنت.

 في الأول لازم يكون عندك  أساسيات عمل مشروع خاص، وزي ما قال كريس هي:

1- المنتج/الخدمة:

 وهنا ممكن تشتغل على شغفك، ومهاراتك وخبراتك.

تشوف إنت بتحب ايه أو شاطر في إنك تعمل إيه، وابدأ قدمه في شكل خدمة للناس، تعود عليك بالربح.

طيب لو ماعندكش شغف بحاجة أو خبرات!

هنا هتشوف الناس بتشترى ايه ودايمًا محتاجة منتج ايه وتوفر لهم منه.

قدّر احتياجهم عشان وسهل عليهم توصيله عشان يختاروك إنت بس.

 2- الزباين:

لازم تتأكد أن في زباين محتاجة المنتج بتاعك، وده تقدر توصله من خلال السيرش أو أنك تعمل استطلاع رأيي على الفيسبوك أو تنزل تعمله في المنطقة اللي هتقدم فيها الخدمة أو المنتج بتاعك.

3- الربح:

سهّل طرق الدفع على الزبائن، وفي طرق كتير منها مثلًا الدفع مع التسليم، أو من خلال الدفع الفوري.

يعني الأفضل لزبونك هو اللي تعمله في البداية عشان يحبوك.

المهم الهدف اللي تطلع به من مشروعك هو زيادة المبيعات، ومش معنى إن عندك زيادة في المتابعين يبقى عندك زيادة في المبيعات!

لا خالص، المتابعين حاجة والمبيعات حاجة تانية خالص.

دلوقتي كل اللي عليك تختار السمكة اللي هتديها للناس كويس اوي، ومتنساش تتابعنا على #كتاب_في_دقيقتين