مش يمكن لما أجرب أطلع بعرف!

جملة قالها أحمد مكي في فيلم حلزقوم جوا إطار كوميدي جدًا، بس هي في الحقيقة جملة مدروسة وعلمية جدًا.

ولو فعلا تخلصت من خوفك من الفشل وجربت، احتمال كبير تلاقي نفسك بتعرف، وبتبدع كمان.

في كتاب design thinking للعظيم ديفيد كيلي قالنا اننا لازم نتخلص من ال mental blocks في حياتنا عشان نقدر نبندع ونحقق أعلى المكاسب في حياتنا.

وال mental blocks دي هي المخاوف بتاعتنا؛ زي بالظبط الخوف من التجربة، والخوف من الفشل فيها، والخوف إنك تبذل مجهود على الفاضي، والخوف في أوقات من الخوف نفسه.

كان هدف ديفيد الأساسي هو الوصول للإبداع لما تفكر في اي مشكلة بتواجهك، أو في شغلك لو بيعتمد على الحلول والإبداع.

وقال إنه لازم تتخلص من الصندق، وإنك تجرب تفكر برا الصندوق.

وده هيحصل بخطوتين وهما:

1- Divergent:

تتوسع بأفكارك في كل مكان، اوصل بها لبلد ثانية، لفكرة مختلفة، ممكن متبقاش قريبة من فكرتك، بس في حاجة بتربطهم ببعض ولو من بعيد.

2- convergent:

شوف كل الأفكار اللي طلعتها في رقم 1 وابدأ بقى اختار منها المناسب ليك، الأقرب واللي ينفع فعلًا لحل مشكلتك.

وده يعتبر حل سريع، لكن لو عايز فعلا تطبق ده بشكل علمي ومتقن أكثر لازم تعمل ال steps اللي وضحها برضو ديفيد كيلي في الكتاب، وهي:

1- التقمص: Empathize

حط نفسك مكان صاحب المشكلة، الزبون يعني، وابدأ حدد الأسئلة التي توضح وتطلّع منها أكبر كم من المعلومات التحليلية المفيدة عن الموضوع.

2- التعريف: Define

ودي مرحلة الوصول للتعريف الدقيق  للمشكلة بعد فلترة المعلومات اللي طلعتها من ال empathize. وتبدأ تحللها بشكل علمي وموضوعي وتحط النتائج بتعريف دقيق تقدر توصلها.

3- التفكير بإبداع: Ideate

هنا هتحط أفكار وحلول إبداعية للمشروع، ودي دايمًا بيقوم بها فريق عمل عشان تعملوا brainstorming يقدر يخلق أفكار وحلول كتير ومختلفة.

وبعدين تفلتر كل ده حسب ملائمتها وإمكانية تنفيذها.

4- النموذج المبدئي:  Prototype

هتنفذ الفكرة اللي وصلتلها من كل الأفكار اللي طلعتها، وتبدأ تصيغها في شكل نموذج مبدئي للمشروع  اللي بيحل المشكلة، واللي تقدر تطبقه وتختبره بشكل عملي.

5- التجربة والاختبار: Test

وهي مرحلة الاختبار للنموذج المبدئي (الفكرة اللي نفذتها مبدأيًا)، وبيتم فيها تقييم المشروع والحلول ومدى نجاحها، وهل هو محتاج لتعديلات ولا لأ، وبعدها تعمل إعادة تقييم بناء على نتائج الاختبار.

لغاية ما تحقق النتائج المرجوة.

طبق الطريقة دي في أي مشكلة بتواجهك، وفي شغلك وهتلاقي نفسك بتطلع أفكار لا يمكن كنت تفكر فيها، وجربتها كمان وعرفت إذا كنت بتعرف تعمل الحاجة دي ولا لأ!  

دلوقتي قولنا نفسك تجرب إيه وخايف؟

#كتاب_في_دقيقتين

#design_thinking

#WORK_BRAND

#Power_of_success